KALIBO, Aklan — Uman nga igapasaka it pamunuan it kontrobersiyal nga West Cove Resort Boracay ro kasong arson kontra sa pilang indibidwal bangud sa pagkasunog kara ko nagtaliwan nga dag-on.
Sa interview it Bombo Radyo, ginpahayag ni Crisostomo “Cris” Aquino nga mababoe ro andang pagpati nga hungod nga ginsunog ro andang resort agud nga mapadasig ro pag-demolish kara.
Suno kana nga matapos sanda nga utdan it kuryente ag tubi hay natabu ro insidente.
Bangud kara, nagpasaka suno kana imaw it kasong arson kontra kay dating Municipal Executive Assistant for Boracay affairs Rowen Aguirre ag iba pa, apang nabasura sa piskalya bangud sa kakueangan sigon it probable cause.
Ko nagtaliwan eamang sigon nga mga adlaw nanda nabaton ro arson report halin sa Bureau of Fire Protection ukon BFP-national headquarters nga may sunog gid man nga natabu rason nga ginhinyu nanda ro re-investigation.
Nagaduda sanda nga raya hay gin-igpit bangud nga maskin ro sangka opisyal it DILG hay naghambae nga gin-photo shop eamang ro pagkasunog.
Samtang, dismayado man si Crisostomo bangud sa mahinay sigon nga daeagan it anang kaso sa Ombudsman.
Nasayuran nga sambilog ro West Cove sa mga establisimento nga ginmanduan nga ipasarado kat ginpatigayon ro closure order sa Boracay sa sueod it an-um nga buean para sa rehabilitasyon bangud nga ro istraktura sigon it resort hay makabig nga mother of all violations.
