KALIBO, Aklan – – – Una sa “wish list” ni Pangueong Rodrigo Duterte nga ipaiway ro Barangay ag SK Elections sa Oktubre 23, 2017 ag magpatigayon eon lang it appointment.
Suno kay Department of Interior and Local Government (DILG) Assistant Secretary Efimaco Densing III nga kaparehas man kara ro panan-awan it andang taeatapan.
Sa makaron suno kana hay may kanya-kanyang version ro Kongreso ag Senado sa pagpaiway it election.
Sa Kongreso, ginaduso ro postponement apang ipabilin ro mga opisyal.
Samtang sa Senado, ginaduso ro pagpaiway apang makaangkon it appointment.
Ginpaathag ni Densing nga 40 porsiento sa listahan it mga barangay kapitan sa bilog nga nasyon ro kaeakip sa watch lists ag may koneksiyon sa illegal nga droga.
Ro nasambitang listahan suno kana hay validated ag naghalin sa PNP, PDEA ag NBI.
Kinahang-ean sigon anay nga makaangkon it “cleansing” sa mga opisyal sa barangay antes uman nga magpatigayon it Barangay ag SK elections.
