Ginkakibot ni Caticlan Boracay Transport Multi-Purpose Cooperative ukon CBTMPC consultant ag SB Member Godofredo Sadiasa ro pagpamalibad it tag-iya ag CEO it San Miguel Holdings Corporation nga si Ramon Ang angot sa naging pahayag ni Aklan 2nd district congressman Florencio Miraflores nga naga-atras eon raya sa pagpatindog it 2.54-kilometrong Boracay bridge.
Suno kana, sa mismong adlaw sigon it meeting ku Mayo 13, sayod eon nana nga may manifestation eon sa Ang nga indi nana pagpadayunon ro nasambit nga tulay, apang ginpili nana nga mag-hipos bangud nga bukon imaw it kaibahan sa nasambitan nga pagpupueong. Ginkutana ag ginhueat eon lang sigon nana kun sino ro maga-anunsyo it desisyon.
Paathag nana, ro nagiging isyu sa makaron hay kun sin-o ro nagahamabae it minatuod, apang ro anang panindugan hay nagapati sa gihapon imaw sa mga opisyal it gobyerno bangud nga indi man sigon pwede nga mag-imbento eamang it istorya ro mga raya bangud nga nakasalalay kara ro andang political nga karera.
Dugang pa kara, uwa man sigon it opisyal nga pahayag nga nabatian halin mismo sa kay Ang ukon sa anang kumpanya. Makabig sigon nga political suicide ro ginhimo it mga opisyal it gobyerno kun naga-himo-himo eamang sanda it istorya.
Ro nasambit nga tulay nga magakonekta kunta sa Mainland Malay ag isla it Boracay hay nakaangkon it nagkaeain-eain nga reaksyon kun sa siin ginapunto ro magiging posibleng epekto kara sa ecosystem, turismo, ag pangabuhian sa isla.
