KALIBO, Aklan–Kasunod it manami nga tyempo halin pa ko mga nagtaliwan nga inadlaw, haeos dali eon lang matapos it Department of Public Works and Highways ukon DPWH ro andang pagtrabaho sa mga nagapangunang karsadahon nga nakitaan it mga buho-buho sa bilog nga probinsya it Aklan.
Ginpahayag ni Engr. Joey Ureta, head it maintenance section it DPWH Aklan nga haeos 96 porsyento eon ro andang natapos sa pagkaayad it mga potholes sa west section it probinsya ag ginaeauman nga matapos eon raya sa sueod it daywang adlaw kon sigidas ro silak.
Samtang pag-abot mat-a sa west section it Aklan hay kapin sa 92 porsyento eon ro andang accomplishment ag ginasaligan nga matapos eon ro patching of potholes sa sueod it tatlong adlaw.
Ginpahayag dugang ni Engr. Ureta nga sa pag-usisa it inspector maghalin sa DPWH region VI hay naging kontento sigon raya sa trabaho it andang taeatapan bangud nga hueoyapon eon lang ro mga buho-buho nga makit-an sa national highways nga sakop it Aklan.
Sa makaron suno kana hay nagapadayon ro iba pa nanda nga trabaho sa mga karsadahon ag haeos naga-overtime ro andang mga trabahante agud nga matapos ro trabaho samtang manami pa ro tyempo para mataw-an man it maayos ag eowas nga daean ro mga motorista maging ro mga byahero.
