KALIBO, Aklan–Ginakabig nga malinong ag matawhay it Bureau of Fire Protection (BFP) ro kabilugan nga selebrasyon it bag-ong dag-ong sa banwa it Kalibo.
Suno kay INSP Carlos Magbanua, Deputy Municipal Fire Marshall it BFP-Kalibo nga owa sanda it nabaton nga anumang report ko New Year’s Eve angot sa sunog, naeukpan it paeupok ukon aksidente sa karsada.
Posible sigon nga nakaapekto kara ro hugut nga koordinasyon it nagkaeain-eain nga force multifliers, volunteers ag lokal nga gobyerno sa pagpaeapnaag it mga impormasyon angot sa eowas nga pagpatigayun it selebrasyon.
Ginpasaeamatan man kara ro mga pumueoyo nga mas ginpili nga magselebrar it masadya ag magkriar it sangag gamit ro ibang alternatibo kaysa maggamit it paeupok.
Sa pihak nga parte, sangkiri eamang ro numero it mga nailistang insidente it sunog it taeatapan ko nagtaliwan nga dag-on.
Suno kay Magbanua, daywa eamang ro makabig nga pinakamabahoe nga sunog nga andang ginrespondehan.
Posible sigon nga nakabulig kara ro kada dominggo nga paglibot it andang firetruck agud nga padumduman ro mga pumueoyo angot sa fire safety.
