Nagpanugyan ro sangka health expert sa publiko nga kinahang-ean nga ipabilin gihapon ro pagsunod sa minimum health protocols kaparehas sa paggamit it face mask, pag-obserba it physical distancing ag pagpabilin nga malimpyo ro eawas.
Raya hay kasunod it nailistang kaso it monkeypox sa probinsya it Iloilo nga kauna-unahang kaso nga nairekord sa rehiyon it Western Visayas ag pang ap-at sa bilog nga nasyon.
Suno kay Dr. Ian Philip Padilla, sangka public health expert it University of the Philippines ukon UP-Visayas nga bukon it maeayo nga makatapik sa kaeapit nga probinsya ro virus.
Ginpaathag ni Dr. Padilla nga maskin ginakabig nga virus ro monkeypox apang bukon it kaparehas raya sa coronavirus disease ukon covid-19 nga madasig nga magkalhit ro reproduction.
Matapnan it nasambit nga virus ro sangka indibidwal kon may intimate interaction sa infected person.
Ginpaathag dugang ni Dr. Padilla nga ro incubation period it virus hay kapin sa sang dominggo ag nagaabot man sa 21 diyas ro duration period.
May kaangtanan kara, ginapanan-aw ni Dr. Padilla nga preparado ro health system it rehiyon bangud sa naagyan sa pandemya engkaso nga makaangkon it outbreak sa nasambit nga virus.
Maskin papaano suno kana hay nag-improve ro health system sa nasyon para makatapna insigida sa pagkalhit it sakit.
