IBAJAY, Aklan — Owa masyadong nabatyagan it mga taga banwa it Ibajay ro tumama nga magnitude 2.6 nga linog agahon it Lunes, kun sa siin, suno sa Phivocs sa nasambit nga banwa ro epicenter kara.
Suno kay Ibajay Mayor Jose Miguel Miraflores nga owa it kahalitan nga gintuga sa andang lugar ro linog.
Sa pihak kara, nasayuran sigon nanda nga ro Ibajay hay nahamtang sa West Panay Fault, sangka aktibong geological feature sa isla it Panay, rason nga prone sanda sa mga linog.
Samtang, ginpasiguro man it alkalde nga sigidas ro andang pagpatigayon it earthquake drills ag mga trainings agud nga maging haum sa tanan nga oras.
Dugang pa ni Mayor Miraflores nga haeos natapos eon ro pag inspection sa mga structural ag elektrikal nga kondisyon it andang mga building matapos ro magnitude 5.3 nga linog ko nagtaliwan nga domingo kun sa siin owa man ro mga raya nakitaan it mga giltak ukon crack.
Mag-eowas eamang suno kana sa bumigay ukon nahugos ag nakaangkon it buho nga parte it andang old bridge ukon mas kilaea sa tawag nga Colongcolong bridge nga eubusan eon makaron nga ginsarado sa mga motorista.
Sa ginpatigayon nga inspeksyon it mga awtoridad, nakitang bukon eon it eowas nga agyan ro nasambit nga tulay rason nga insigida raya nga ginbutangan it abang ag warning sign.
