KALIBO, Aklan—Pagpataeang eamang sa mga Aklanon ro naging pahayag ni Pangueong Rodrigo Duterte nga owa eon it maboe-an nga pondo ro gobyerno rason nga pagapasugtan ro pagpatindog it casino sa isla it Boracay.
Raya ro ginpahayag ni Bagong Alyansang Makabayan ukon Bayan-Aklan chairperson George Calaor.
Suno kana nga pamatuod kara ro ginbulgar it Commission on Audit ukon COA sa ginkwestiyon nga mga bilyunes nga pondo nga ginbuhos it gobyerno sa nagkaeain-eain nga ahensiya it gobyerno.
Bastante suno kana ro pondo, apang padayon nga naga antus ro mga pumueuyu bangud nga owa ginagastos it tama ro kwarta para sa kamaeayran it publiko ag ko nasyon.
Sa pihak nga parte, nagapati si Calaor nga gusto nga mabo-oe it administrasyong Duterte ro pagdumaea ag operasyon it Boracay bangud sa planong pagpasueod it mga mabahoe nga dumueuong nga kapitalista ag bukon it para sa kamaeayran it mga Aklanon.
Posible suno kana nga maduea sa mga aklanon ro nagapangunang ginaboe-an it kita kara kon magamadinaeag-on ro BIDA-GOCC.
