Nagpadumdum ro Malacañang sa publiko nga indi magtanum it kakoeba ag pagkabaeaka kasunod it pagbilin it mga symbolic coffin ukon kabaong nga may mga litrato it Chinese officials sa pilang lugar sa Metro Manila.
Padayon eon ro pag-trace ukon pag-usoy it Philippine National Police (PNP) sa grupo ukon mga indibidwal nga responsable sa pag-aywan it mga kabaong sa limang mga lugar, kaibahan eon sa atubang it Chinese Embassy sa Makati City.
Suno kay Communications Undersecretary Claire Castro, gina-respeto it gobyerno ro freedom of expression, apang indi makabulig sa nasyon ro nasambit nga klase it aksyon. Ginkundina man it Department of Foreign Affairs (DFA) ro insidente ag ginpahayag nga owa raya naga-representar sa pamaagi it gobyerno sa pagdumaea it foreign relations ukon sa pamaagi it mga Pilipino sa pagpahayag it kritisismo.
Samtang, ginkundina man it Chinese Embassy spokesperson Ji Lingpeng ro insidente ag gintawag raya nga political provocation, personal attack ag intimidation.
Ginpahayag pa it embahada nga komitado raya sa pagmintinar it mabakod nga relasyon sa tunga it China ag Pilipinas.
