Nagsaka sa 2.3 porsiyento ro inflation rate sa Western Visayas ko Enero 2026 halin sa 1.8 porsiyento ko Disyembre 2025.
Suno sa Philippine Statistics Authority (PSA) Western Visayas, ro pagdasig it inflation hay nagapangunang daea it pagtaas it presyo sa pabaeay, tubi, kuryente, gas ag iba pang panggatong, kamana man sa mga restaurant ag accommodation services ag gaeastuson sa household maintenance.
Ro mga nasambit nga sektor ro may pinakamabahoe nga amot sa paghueag it consumer price index sa rehiyon.
Nailista man ro pagtaas it presyo sa aeak ag sigarilyo, eambong ag sapatos, ikamayad nga eawas, information and communication, ag personal care ag iba pang serbisyo.
Sa pihak kara, naghinay ro inflation sa pagkaon ag non-alcoholic beverages nga may pinakamabahoe nga timbang sa consumer basket nga nakabulig agud mabuhinan ro kabilugang pagtaas it presyo.
Mas manaba man ro inflation sa recreation, sport ag culture, samtang nagapabilin nga malig-on ro presyo sa transportasyon, edukasyon ag financial services.
Maskin mas mataas kumpara ko nagtaliwan nga dag-on, mas manaba gihapon ro 2.3 porsiyentong inflation makaron nga Enero kaysa sa 4.0 porsiyento ko Enero 2025.
Padayon mat-a nga ginamonitor it mga awtoridad ro hueag it presyo it mga baeak-eon ag serbisyo samtang ginasaligan nga magaatubang ro rehiyon sa kasarangan nga pressure sa presyo sa mga unang buean it 2026.
