KALIBO, Aklan—Nagahueat eon lang it “go signal” ro Philippine Coast Guard ukon PCG-Aklan halin sa national headquarters sa paglunsar it “Oplan Undas Ligtas Biyahe” agud nga masiguro ro kaayusan ag kalinong sa tanan nga mga pantalan sa probinsiya para sa nagahilapit nga pagdumdum it pista minatay.
Suno kay Ensign Marvince Genzola, commander it Coast Guard sub station Boracay nga partikular nanda nga ginapahauman ro pagbuhos it mga turista sa isla .
Nakataeana sanda nga magatukod it Passenger Assistance Desks sa mga pantalan pasueod ag paguwa it Boracay agud nga makasabat sa tanan nga mga reklamo ag kinahangeanon it publiko.
Ginaeauman eon sigon nanda nga magiging masako eon man ro Caticlan jetty port bangud sa pagdagsa it mga pasahero nga hugut nga ginabantayan it mga awtoridad.
Dugang pa ni Ensign Genzola nga sigidas eon ro andang mga pueong kaibahan ro iba pang law enforcement agency ag nagtungdan nga ahensiya it gobyerno para sa hugut nga seguridad nga igapatuman.
Sa makaron suno kana hay maid-id ro andang ginapatigayon nga mga pre-departure inspection sa mga bagahe agud nga malikawan nga maka-eusot ro mga kontrabando ag mga makamaeatay nga hinganiban.
Sa pihak nga parte, ginpahayag ni Genzola nga haum ag naka-standby ro andang mga floating assets engkaso nga makaangkon it owa ginaeauman nga mga insidente.
