KALIBO, Aklan— Nakatutok makaron ro Philippine Coast Guard (PCG) sa hugot nga implementasyon it health protocols kontra sa Covid-19.
Suno kay Senior Chief petty Officer Dominador Salvino, deputy commander it PCG Aklan nga pag-abot pa eamang sa pantalan hay nagapatigayon eon sanda it profiling sa tanan nga naga-aeabutan nga ginakaeakipan it mga locally stranded individuals ukon LSI kamana man mga cargoes.
Antes nga makabyahe suno kana hay ginasigurado nanda nga may nagakaigong dokumentong ginabuytan ro mga pasahero kaparehas it health certificate halin sa munisipyo nga andang ginhalinan ag travel authority sa natungdan nga taeatapan it pulisya.
Mag-eowas kara, kinahang-ean man suno kana nga kumpleto it dokumento ro pagtransport it mga cargoes.
Samtang ro mga ginakabig nga APOR ag frontliners hay ginasikyaran ro mga raya it travel order agud nga masigurong legal ro andang panaw.
As much as possible suno kana hay kinahang-ean nga may koordinasyon ro kada indibidwal sa andang ginaulian nga lokal nga gobyerno agud nga inde eon sanda ma-hold sa pantalan pagpanaog sa barko.
Inde sigon sanda pwede nga magsakay ukon magpanakayon sa pampublikong transportasyon agud nga malikawan ro pagkalhit it virus eabi eon ag sa mga high risk areas sanda naghaealin.
Sa makaron suno kay Salvino hay tayuyon ro andang pagbyahe sakay ro mga LSI’s kon sa siin insigida man nga nagapatigayon ro mga raya it decontamination kontra sa pagkalhit it makataeapon nga sakit.
