KALIBO, Aklan—Sangka penitential procession ro ginpatigayon kaina it alas-4 it aga-aga sa “Bisperas it Kapiestahan ni Señor Sto. Niño de Kalibo” nga ginsundan it misa para sa mga deboto bandang alas 5:00 it aga-aga sa St. John the Baptist Cathedral.
Bandang alas- 8:00 kaina it agahon sa pag-umpisa it Kalibo Sadsad Ati-Atihan contest hay gin bendisyunan ro mga tribu ag pilgrims .
Nakaangkon man it blessing of children ag sa udtro adlaw hay may Hornada ukon rhythmic drumbeating, ag makaangkon it Vesper Mass bandang alas-5:00 it hapon.
Para sa “Kaadlawan it Kapiestahan ni Señor Sto. Niño de Kalibo” hin-aga, January 19, sangka Pilgrims Mass sa Kalibo Cathedral grounds ro pagahiwaton bandang alas- 7:00 it agahon nga pagasundan it grand procession bandang alas 9:00 it agahon.
Pagka-alas-3:00 it hapon hay makaangkon it relihiyosong prusisyon ag torch parade sa mga kalye it Kalibo, ag sangka ritwal it pagtapos it liturhiya bandang alas 9:00 it gabi-i.
Ro mga aktibidad it Kalibo Señor Santo Niño Ati-atihan para sa makaron nga dag-on hay magatapos sa sangka seremonya it pag-award para sa mga nagdaog sa nagkaeain-eain nga contest bandang alas 10:00 it gabi-i sa Magsaysay Park.
Pilang adlaw antes ro selebrasyon, haeos fully booked eon ro mga hotel ag mga lodging house kamana man ro mga boarding houses sa banwa it kalibo .
Samtang, mas pa nga ginhugtan ro seguridad sa bilog nga banwa it kalibo partikular sa festival zone kamana man sa st john the Baptist cathedral kun sa siin maabu ro nagatambong it misa ag nagapaeapak.
