KALIBO, Aklan — Ginkumpirma it Department of Education (DepEd) Western Visayas nga may pilang mga delegado ro ginpaidaeum sa pagbueong matapos nga makaangkon it injury sa pagsabak sa paghampang sa nagapadayun nga Palarong Pambansa 2024 sa Cebu City.
Suno kay DepEd Regional Office 6 spokesperson Hernani Escullar Jr., nga may naka-standby nga 24/7 nga mga medical doctors ag nurses sa andang billeting area sa Guadalupe Elementary School nga puro naghalin sa Region VI agud nga magtratar sa mga atleta, coaches, ag iba pang staff nga magakinahangean it insigidang atensyong medical.
Kaeabanan sigon sa mga raya hay sport-related injuries.
Dugang pa nga nag-provide man ro Cebu City government it medical team agud nga mag-asikaso sa mga delegasyon halin sa 17 nga mga rehiyon nga nagapasakop sa national sporting event agud nga masiguro nga eowas ro mga raya .
Dugang pa ni Escullar nga umpisa nga mag-abot ro delegasyon ko nagtaliwan nga domingo sa Cebu hay owa man it nailistang anumang untoward incident.
Madumduman nga ro event hay opisyal nga ginbuksan ko Martes, Hulyo 9.
Sa pihak nga parte, kumpiyansa si Escullar nga sa pagbueag it Negros Island Region sa Western Visayas hay indi raya maka apekto sa medal standing ag magapabilin raya nga power house.
Uman sigon sanda nga maga-train it mga mayad nga atleta halin sa Isla it Panay ag Guimaras agud nga mapun-an ro pagkaduea it Negros Island.
Samtang , sangka Aklanon ro nakaangkon it silver medal sa 4×50 m medley relay sa swimming secondary girls nga nakilaea kay Nuche Veronica Ibit.
Mag-eowas kana, nakabo-oe man it silver medal si Rachel Ann Malayas sa long jump athletics elementary girls.
