KALIBO, Aklan— Nagakabaeaka ro pilang Public Utility Vehicle ukon PUV ag mga tricycle drivers may kaangtanan sa uman nga pagtaas sa presyo it mga produktong petrolyo makaron nga adlaw it Martes.
Suno kay Joel Rencio, miyembro it KAPITODA nga ro panibag-ong bigtime price increase hay bawas eon man sa andang kita.
Owa pa man sigon it plano ro andang organisasyon ag owa pa sanda nakahinun-anon angot sa posibleng pagpatuman it dugang nga pamasahe.
Sa pihak kara, owa man sanda it mahimo sa bag-ong price increase ag magapadayun gihapon sa andang pagbiyahe agud nga may maipakaon sa andang pamilya ag iba pang gastos.
Mabahoe nga bulig sigon kon makatau man it fuel subsidy ro gobyerno.
Samtang, suno kay Rencio nga mahagan-hagan para kana bangud nga imaw ro nagamaneho it anang tricycle apang malisod para sa mga naga-boundary.
Mabahoe man ro andang pagpasaeamat sa mga pasahero nga naka-intindi nga nagatau it sobra sa ginasukot nanda nga minimum fare.
Madumduman nga nagpatuman it mabahuean nga pagtaas sa presyo it produktong petrolyo umpisa kaina it agahon.
Kapin sa P2.50 hasta P2.80 ro dugang nga presyo sa kada litro it gasoline samtang P1.80 hasta P2.10 man ro price increase sa kerosene ag nagahampang sa P1.50 hasta P1.80 sa diesel.
