KALIBO, Aklan–Bukon it pabor ro pilang miyembro konsumidor it aklan electric cooperative ukon akelco sa ginaproponer nga patungan it 10% nga surcharge ro sukot sa kuryente kon indi eagi makabayad it electric bill sa tamang oras.
Suno kay Patrick Tarre, residente it barangay galicia, madalag ag sambilog sa mga member-consumer nga nagtambong sa dag-unan nga general membership assembly it akelco sa ABL Sports Complex makaron nga adlaw it Sabado nga ro proposisyon hay dugang nga kalisod eabi eon sa may mga past due nga electric bill.
Pila sigon sa mga raya hay indi eagi makabayad bangud sa kawad-an it kwarta.
Masyado sigon nga mabahoe ro 10% nga dugang sa pagabayaran nga bill.
Pabor imaw nga may surcharge bilang penalidad sa mga delingkwente nga konsumidor, apang panabaan raya it maskin daywang porsiyento eang.
Apela nanda nga kinahangean nga ayuson it akelco ro andang serbisyo kasunod it mga naexperiensiyahan nga power interruption nga owa it nagakaigo nga advisory.
Madumduman nga nauna eon nga ginpahayag ni Akelco general manager Atty. Ariel Gepty, haeos 20% eamang it andang 152,000 nga mga miyembro-kunsumidor ro nagabayad it electric bills sa tamang oras.
Kaabuan sigon sa mga raya hay nagahueat pa it 48-hour disconnection notice nga may mabahoe nga posibilidad nga ma-utdan it supply it kuryente.
Ro proposisyon hay sambilog sa mainit nga gintalakay sa general membership assembly ag nagakinahangean pa it approval it Energy Regulatory Commission.
