KALIBO, Aklan — Posibleng may legal nga basehan si dating Ako Bicol Partylist Rep. Zaldy Co sa pagdihon it asylum application sa France.
Raya ro ginpahayag ni Atty. Axel Gonzales, sangka political analyst sa Aklan.
Suno kana nga raya hay nakadepende sa ebidensiyang anang maipakita angot sa gina-alegar nga political persecution ag paeag sa anang kaeowasan.
Nauna eon nga ginkumpirma it Malacañang nga si Co hay nagdihon it political asylum samtang sa France matapos makahalin sa kustodiya it Czech authorities.
Ginpaathag ni Atty Gonzales nga sambilog sa mga basehan nga kaeabanan nga gina-usisa sa asylum cases hay kun ro aplikante hay may “well-founded fear of persecution” bangud sa pulitika, panan-awan, relihiyon, ukon iba pang protektadong rason.
Dugang pa kara nga engkaso nga mapamatud-an ni Co nga ro anang mga kasong ginapangatubang sa Pilipinas hay may eamod pamulitika ukon may seryosong peligro sa anang kaeowasan, pwede raya nga ikonsidera it French authorities.
Sa pihak kara, owa raya awtomatikong nagakahueugan nga ro pagdihon it asylum hay insigidang maaaprubahan.
Pahayag pa ni Atty. Gonzales nga separado nga proseso ro asylum request sa anumang warrant of arrest ukon Interpol notice, rason nga posibleng magbuhay ro pagresolba sa kaso samtang gina-usisa it France ro anang aplikasyon.
Sa makaron hay owa pa it opisyal nga pahayag ro gobyerno it France angot sa status it aplikasyon ni Co, sandig sa privacy ag asylum regulations it Europa.
Sa pihak nga parte, padayun man nga ginatinguhaan it Philippine government nga maka-usoy it mga legal nga tikang agud nga mapabalik si Co sa nasyon.
