Kasunod it biyahe ni Pangueong Bongbong Marcos sa Amerika, nasayuran nga naga-abot sa haeos $4 billion dollars nga investment ro anang gin-uli.
Raya hay base sa mga business agreement ag commitment nga ginkasugtan it Pangueo ag mga dumueuong nga negosyante.
Angot kara, ginatantiya nga kapin sa 112,285 nga trabaho ro ginaeauman nga maobra bangud sa mga gin-uli nga investment.
Kaibahan sa mga investment hay may kaangtanan sa Information Technology and Business Process Management (IT-BPM), data centers, ag manufacturing.
Sa pihak kara, ginklaru nga ro nasambit nga kantidad hay bukon it awtomatikong magasaeaming sa future investment.
Maskin nga maabu nga kumpanya ro nagpahayag it interes nga maga-kapital, kinahangean sa gihapon nga maselyuhan ro investment pledges.
Samtang, ro pangutana, haum eon baea ro Pilipinas sa pagsueod it mga dumueuong nga negosyante?
Halin sa airport, trapiko, internet, transaksyon sa gobyerno ag iba pang isyu nga may kaangtanan sa negosyo, ready eon baea kita.
Dapat maging maayos, madasig ag malimpyo ro proseso it pagnegosyo agud nga indi kita mabutang sa aeang-aeang kon magsueod eon ro mga investors.
Owa it maeain nga ginabida ro mga manami nga lugar sa atong nasyon eabi eon ro mga trabahador nga mga highly skilled ag mataas ro kuwalipikasyon bangud nga raya hay may kamatuoran.
Basta nga kadungan kara hay ro pagpasiguro nga maayos ro kabilugan it pagnegosyo.
