Ginakabig ni sangguniang panlalawigan member nemesio neron, chairman it committee on peace and order nga welcome development ro presensiya it mga katapo it Regional Drug Enforcement Unit ukon RDEU – Region 6 sa probinsiya it Aklan.
Suno kana nga bangud sa pagpanguna it RDEU-6 sa mga drug buy-bust operation sa probinsiya hay bulto-bulto eon it mga shabu ro narekober nga nagabalor it mabahuean nga kantidad.
Pinaka-ulihi kara hay ro andang madinaeag-on nga operasyon sa isla it boracay kun sa siin sangka tour guide nga nakilaea kay Gilbert Arabit, 43-anyos ro naaresto sa ginkasa nga buy-bust opeartion sa Sitio Bantud, Manoc-Manoc, Boracay.
Narekober sa anang posesyon ag kontrol ro 11 nga sachets it ginadudahan nga shabu nga may street value nga P204,000 ag sangka sachet nga gingamit sa operasyon nga nagabalor it P17,000.
Handum sigon it tanan nga makaangkon it drug free nga probinsiya agud nga makapangabuhi it hilway ag owa it ginakahadlukan.
Pinaagi suno kana sa pagbueuligan it komunidad ag gobyerno hay madinaeag-on raya nga maabot.
Sa pihak nga parte, indi sigon maduea ro mga pagduda nga may ma-impluwensiyado nga tawo nga nagaprotekta sa illegal nga opeasyon kon mahina ro accomplishment it sangka banwa eabi eon sa illegal drugs.
Nagapati man imaw nga dapat nga matutukan ro isla it boracay bangud target it mga drugs dealers ro mga tourist spot nga ginadayo it mga foreign tourists.
