Kasunod it plano it gobyerno nga pag-import it asin bangud sa gina-alegar nga kakueangan it suplay ro paghueag man it presyo kara sa merkado.
Ginklaro it sangka asin vendor nga si Arthur Badiana it Brgy. Andagao sa banwa it Kalibo nga bastante ro suplay it asin sa Probinsya it Aklan ag owa it kamatuoran ro nasambit nga shortage.
May paghueag sigon sa presyo it asin bangud sa nagmahae ro tao it supplier nanda maghalin sa Mindoro.
Mahina sigon ro ani it asin sa nasambit nga lugar bangud sa tig-ueuean nga panyempo ag ro pagtaas it pamasahe rason nga nagmahae man ro tao kanda it supplier.
Kapin sa 100 pesos kada saku ro gintaas it presyo it asin kung siin ro dating P18 kada kilo hay P20 eon makaron.
Kapin sa P5 man ro gintaas kada gantang it asin kung siin ro dating P40 kada gantang hay P45 eon makaron.
Dugang pa kara ni Badiana nga owa sanda it mahimo kundi magpasaka man it presyo para malikawan ro pagkalugi bangud ro pagbolante ukon pagbaligya malang man it asin ro andang ginapangabuhian.
