KALIBO,Aklan– Nagapabilin nga mataas ro presyo it asukar sa merkado publiko sa banwa it Kalibo.
Owa sa gihapon it pagstable sa presyohanan it nasambit nga produkto apisar nga pilang buean eon ro makataliwan.
Suno kay Betty Robelo sangka negosyante sa Kalibo Public Market nga sigidas makaron ro pagtinaas sa presyohanan it asukar bangud sa kakueangan it suplay kara sa probinsya it Aklan.
Kapin sa tatlong supplier sigon ro may una imaw sa makaron ag puro maghalin sa ibang probinysa.
Owa man sigon sanda it mahimu sa presyo nga ginatao kanda it andang mga supplier kungdi batunon eon lang ag ipatuman.
Ginpahayag dugang, may nakataeana pa sigon nga pagdugang it kapin sa P2 pesos sa presyohanan sa nasambit nga produkto.
Angot kara, kapin sa P2 man ro gintaas sa presyo it brown sugar nga P80 eon makaron kada kilo kamana man sa washed sugar nga P82 makaron ro kada kilo.
Samtang, nagapabilin man ro white sugar sa dati karang presyohan nga P92 kada kilo.
Ginaeauman it mga negosyante it asukar sa banwa it Kalibo nga maganaba eon ro presyohanan kara sa tiempo nga maga-umpisa eon ro harvest season.
Apisar nga nasanay eon ro mga negosyante ag konsumidor sa pagtaas-naba nga sitwasyon sa presyohanan it asukar hay nagaeaum gihapon ro mga raya nga daeayon eon nga makaangkon it pagnaba ro baeakean kara sa merkado publiko
