KALIBO, Aklan—Ginpatawag it barangay council it Manocmanoc sa isla it Boracay ro tatlong gasoline station kaangot sa sobra-sobrang pagtaas sa presyo it diesel ag gasolina.
Suno kay Punong Barangay Nixon Sualog nga maskin may pilang rason kung ham-an mas mataas ro presyo it petrolyo sa isla, kung siin mabahoe nga kontribusyon kara ro transportasyon, apang masyado sigon nga mabahoe ro presyuhan kumpara sa mainland Malay.
Nakabaton eon man sigon sanda it mga reklamo halin sa pilang mga consumer angot sa sobrang taas nga presyo it petrolyo.
Sa Boracay, nagahampang sa P97 hasta P98 ro kada litro it gasoline samtang masobra sa P80 ro kada litro it diesel.
Dugang pa ni Sualog nga nagpromisa ro natungdan nga mga gasolinahan nga ipa-review sa andang supplier ro presyo it langis.
Sa pihak kara, igatugyan sigon nanda ro natungdan nga isyu sa Department of Energy (DOE) para sa nagakaigo nga imbestigasyon.
