KALIBO, Aklan—Mas pang nagnaba ro presyo it sibuyas sa Kalibo public market epekto eon man it pag-aeabutan it supply halin sa local produced partikular sa probinsiya it Iloilo.
Raya ro ginkumpirma ni Roselyn Relado, focal person it Office of the Provincial Agriculturist sa andang ginpatigayon nga price monitoring bilang kaparte it bantay presyo task force it Department of Agriculture ukon DA.
Sa andang monitoring, naga abot eon lang sa 120 pesos ro kada kilo it puea nga sibuyas samtang ro puti nga sibuyas hay 100 pesos kada kilo.
May mga naga-aeabutan pa sigon nga supply it sibuyas halin sa Mindoro ag Nueva Vizcaya, apang bangud sa manaba nga presyo halin sa Iloilo rason nga owa sanda it mahimo kundi nga magpanaba man it presyo.
Ginpahayag dugang ni Relado nga sa makaron hay owa sanda it nakikita nga kakueangan sa supply it sibuyas sa nasyon tuga it bastanteng ani kara it mga mangunguma mag-eowas pa sa pag abot it mga imported onions.
Madumduman nga ko buean it enero nag abot it hasta sa 600 pesos ro kada kilo it sibuyas bangud sa kakueangan it supply kara.
Sa pihak nga parte, ginpahayag nagapabilin nga bastante ro supply ag mabakod ro presyo it iba pang mga panakot sa merkado.
Kamana man ro mga tinuea hay bugana ro supply ag nagnaba ro presyo tuga it padayun nga ani it mga mangunguma kasunod it mga naexperiensiyahan nga pag-uean-uean ko nagtaliwan nga mga binuean nga eubus nga nakabulig eabi eon sa low-land vegetables.
Samtang, ro presyo makaron it special rice hay 50 pesos per kilo samtang ro premium rice hay 40 pesos per kilo , ro well-milled rice hay 40 pesos per kilo ag ro regular well-milled rice hay 36 pesos kada kilo.
Ro presyo it isda hay pabag-o bag-o tuga it low of supply and demand.
