Ginakabaeak-an makaron it Office of the Provincial Agriculture (OPA) nga makaangkon it manaba nga produksyon it paeay makaron nga season bangud sa pagpanaeasa it El Niño Phenomenon eabi eon sa western side it probinsya it Aklan.
Suno kay Provincial Agriculturist Engr. Alexys Apolonio, nga base sigon sa datos it National Irrigation Administration ukon NIA sa 1,800 hectares it kaeanasan sa ikaywang distrito it Aklan partikular sa mga banwa it Lezo, Numancia ag Makato hay kapin sa 200 ektarya eamang it ueomhan ro natamnan it paeay.
Apang, bukon pa it sigurado kon manami ro tubo kara ag kon may manami nga tubas bangud sa kawad-an it tubi.
Angot kara, ro andang taeatapan hay nagahimo it mga pamaagi kon sa siin makakita it bastante nga tubi para masolusyunan ro problema bangud nga nagakinahang-ean it volume it tubi ro mga kaeanasan agud nga ro mga nakatanom hay makaangkon it manami nga ani.
Kon matigayon suno kana hay nagausoy sanda it suporta para makata-o it water pump ukon makaangkon it solar irrigation.
Sa makaron suno kana hay ginaengganyo nanda ro mga mangunguma nga magdivert sa iba pang pananom nga uwa nagakinahang-ean it maabong tubi kaparehas it pagtanom it baeatong, mais ag iba pang tinuean-on.
