Kalibo Aklan —–Nag-apela it pag-intindi ro Provincial Government sa mga Aklanon nga nag-avail it Balik Akean Program.
Raya hay matapos nga nakaangkon it sangkiri nga delay sa pagproseso sa pagpauli sa mga stranded nga Aklanon sa mga kaeapit nga probinsya ag syudad.
Suno kay Ivan Patron, Head Coordinator it Brgy. Affairs Office, tanan nga naga-inquire sa andang opisina hay ginataw-an ro mga raya it inugtaeopangod kon sa siin insigida nga gina-interview ag kon engkaso nga makasueod sa mga prayoridad nga kinahang-ean nga mapauli hay gilayon sigon nga ginaproseso ro mga nagakaigong dokumento.
Apang, kinahang-ean man nga sikyaron ro lokal nga gobyerno nga paga-ulian it stranded nga indibidwal kon haom eon ro andang quarantine facility nga imaw ro temporaryo nga pagatiniran it mga raya sa sueod it 14 diyas.
Required suno kana nga makasueod sa standard ro quarantine facility nga iga-assess it mga natungdan nga health authorities kamana man it Provincial Inter-Agency Aask Force Against COVID-19.
Ginpasiguro man ni Patron nga sa oras nga haom eon ro quarantine facility it tagsa ka LGU’s sa bilog nga probinsya it Aklan hay iga-proseso eon ro pagpauli sa mga stranded Aklanon nga nag-avail sa programa nga may ginabuytan eon nga mga dokumento kaparehas it health certificate halin sa lugar nga gintiniran, certificate nga nagapamatuod nga free to travel ro sangka indibidwal ag letter of acceptance sa natungdan nga lugar nga ginaulian.
Nasayuran nga katuyuan it nasambitang programa nga mabuligan nga maka-uli ro mga stranded nga mga Akeanon sa nagkaeain-eain nga mga siyudad ag probinsiya bangud sa lockdown tuga it coronavirus disease 2019 (COVID-19) pandemic.
