Ginpasiguro ni Aklan first district board member Apolinar Cleope sa pumueoyo it ap-at ka mga barangay sa banwa it Batan nga mataw-an it igtaeopangod ro andang ginareklamo nga proyekto.
Raya hay matapos nga uwa eon sigon nagtubod ro proyekto nga Salin-Tubig nga magasuplay kunta it tubi sa mga panimaeay it ap-at ka mga baryo.
Sandig sa reklamo pinaagi sa sangka sueat nga pirmado it masobra sa sang gatos ka mga residente nga ginpaabot sa opisyal, pagkatakod sigon it tubo hay nagtubod ro tubi apang nagbuhay eamang it daywang buean ag gulpi nga naungkat.
Makaron suno kana hay nagaproblema ro mga pumueoyo bangud nga uwa eon it nagatubod nga tubi halin sa gintakod nga tubo.
Sa pagpangusisa ni SP Cleope, ro nasambit nga proyekto hay ana it Department of the Interior and Local Government ukon DILG rason nga gindangop nana raya sa ahensya ag nagahueat eon lang imaw it sabat.
Ginpresentar nana raya sa plenaryo sa ginpatigayon nga session it sangguniang panlalawigan para makasuhestyon ro tanan kon anu ro mayad nga himuon nga masolusyonan ro problema it mga residente sa oras nga mabaton nanda ro sabat it DILG.
