POLICE Report — Presenteng ginalamayan ro sangka mister samtang padayun nga ginabueong ro sambilog pa matapos nga pagbarilon it sangka pulis sa sueod it KTV Bar sa Brgy. Malasin Dupax Del Norte, Nueva Vizcaya.
Ro suspek hay sangka Police Senior Master Sergeant, 44- anyos ag radio operator it Nueva Vizcaya Police Provincial Office nga sa pagdumaea makaron it Dupax del Norte PNP matapos ro pagpamaril sa daywang eaeaki sa sangka KTV bar sa nasambit nga lugar.
Suno kay PMaj.Nova Lyn Aggasid, Public Information Officer it NVPPO, nauna nga nag-abot ro suspek bago ro mga biktima kun sa siin nakatueog sigon raya rason nga ginbugtaw imaw it tag-ana ag nagpanaw man apang uman nga nagbalik ag idtu eon ginpangbaril ro mga biktima.
Namatay ro 30-anyos nga dating SK Chairman it Mabasa, Dupax del Norte nga tinamaan sa anang ueo samtang naninahan ro 25-anyos nga kaibahan kara matapos tamaan sa tiyan ag padayun nga nagapamayad sa ospital.
Insigida man nga nagpanaw ro pulis matapos ro insidente sakay it anang motorsiklo ag sa pag-usoy kana it mga pulis, nakitang nakatueog raya sa sangka waiting shed sa Brgy. Bitnong sa nasambit nga banwa.
Gin-aresto imaw ag gindaea sa estasyon it pulisya.
Limang basiwo it bala it baril ro narekober it mga awtoridad sa lugar it insidente.
Insigidang ginmandu ni Provincial Director PCol. Jecthopher Haloc, sa mga mga chief of police sa probinsiya nga i-account ro andang personnel para masayuran kun siin raya nakadestino.
Personal man kara nga ginbisita ro pulis nga suno kana hay daea eamang it kahilungon rason nga nahimo nana ro pagpamaril ag indi eon nana madumdumnan kon paalin ukon anong dahilan kun ham-an nana nahimo ro nasambit nga krimen.
Pagapasakaan man it kasong kriminal ag administratibo ro nasambit nga pulis nga una sa pagdumaea makaron it Dupax del Norte Police Station.
