Pabor si dating Sangguniang Panlalawigan member Atty. Harry Sucgang sa panawagan ni Lingayen-Dagupan Archbishop Socrates Villegas nga uman nga maghugpong ro tanan nga mga Filipino sa pagpatigayon it rosary campaign kontra sa agresyon it China.
Ro kampanya hay maga-umpisa sa Hunyo 27 hasta Agosto 15.
Suno kay Atty. Sucgang nga base sa pastoral letter ni Villegas nga may petsang Hunyo 15, ro rosarito hay simpli eamang ag maisot, apang makabig nga gamhanan.
Kapareho sigon sa natabu nga EDSA People Power Revolution ko 1986 kun sa siin nalikawan nga magkalhit ro dugo bangud sa gahum it pangamuyo.
Mabahoe suno kana ro posibilidad nga makaangkon it giyera sa gina-agawan nga teritoryo sa West Philippine Sea eabi eon makaron nga may nagakatabu nga pagsaeakitan sa tunga it tropa it pilipinas ag China.
Dugang pa kara ro napabalita nga pag-aeapinan it mga magkaalyadong mga nasyon.
Ingkaso suno kana nga matabu ro ginakahadlukan nga giyera, eubus nga makaeoeo-oy ro Pilipinas rason nga dapat nga maging kalmado ag ipasaka ro isyu sa United Nations.
Samtang, ginpahayag ni Atty. Sucgang nga posible sigon nga magkalma ro China sa andang gina-obra nga pagpang-agaw it teritoryo kon maabu nga mga nasyon ro nagakundina kanda ag indi magpasilabot sa isyu ro mga komunistang nasyon it Russia ag North Korea.
