KALIBO, Aklan—Ginkalipay it San Jose Municipal Police Station ro naging resulta it andang pagpahaom ag hugot nga implementasyon it mga rules and regulation sa pagbantay ag pagmonitor it sang dominggo nga Western Visayas Regional Athletic Association ukon WVRAA meet 2025 sa andang banwa.
Suno kay P/Lt. Cheryl Sapinosa, chief of police it San Jose PNP Station nga naging malinong ag matawhay ro ginpatigayon nga sporting events sa andang banwa kon sa siin uwa it maeagkuan nga insidente nga nag-eontad hasta sa matapos ro mga hampang.
Nagaabot sa 87 PNP personnel ro nagbueoligan sa pagsikyar it seguridad ag kaeowasan it mga athletes, coaches, trainors ag iba pa.
Mag-eowas kara, mabahoe man ro bulig it iba pang force multipliers kaparehas it mga barangay tanods, bantay bayan ag iba pang volunteers rason nga naging madinaeag-on ro sang dominggo nga regional sporting events.
Ginpahayag dugang ni P/Lt. Sapinosa nga uwa man it mga nag-eontad nga petty crimes sa mga billeting quarters it mga delegado nga temporaryong nagdayon sa andang banwa.
Eubus sigon ro andang pagpasaeamat sa kooperasyon it tanan bangud sa malinong ag matawhay nga sporting events.
