KALIBO,Aklan– Dead on arrival nga gindaea sa Altavas District Hospital ro sangka 15-anyos nga eaeaki ag residente it Brgy. Ipil, Batan matapos nga bumunggo ro ginamaneho nga motorsiklo sa sangka trailer truck kahapon it hapon sa bahin it national highway nga sakop it banwa it Batan.
Sandig sa inisyal nga imbestigasyon it Batan Municipal Police Station, maghalin sa banwa it Banga ro driver it nasambit nga truck ag pauli eon sa probinysa it Capiz nga ginkilaea kay Edwil , 51-anyos ag residente it Brgy. Ilaya Ivisan,Capiz.
Pag-abot sigon sa nasambit nga lugar kat gulpiyada eon lang nga nagpang-agaw it linya it karsada ro biktima ag mabaskog nga bumunggo sa nasambit nga truck.
Kaibahan ro angkas it biktima nga ginkilaea kay Roel Santos, 23-anyos ag residente it Brgy. Magpag-ong,Batan hay parehong nakaangkon it mga lastro sa andang nagkaeain-eain nga parte it kaeawasan.
Nasayuran nga parehong owa it suksok nga helmet ro mga biktima rason nga lastro sa may ueo nga porsyon ro grabeng naangkon it driver ag gintunaan it hinali kara nga kamatayon.
Sa pihak nga parte, nakaangkon it settlement sa tunga it magtimbang nga parte rason nga hilway eon sa makaron ro driver it nasambit nga trailer truck.
