KALIBO, Aklan—Sangka 90-anyos nga lolo ro nagdangop sa Bombo Radyo Kalibo agud nga ireklamo ro anang kaugalingon nga unga ag umagad matapos ro gina-alegar nga pag-angkon sa anang eugta sa barangay Lapnag, Banga.
Suno sa tagreklamo nga si Susimo Gumban, residente man it nasambit nga lugar nga gin-prenda nana ro eugta nga nakapangaean sa anang namatay eon nga misis nga si Erlinda Gumban ko Disyembre 27, 2015 kay Punong barangay Seraspi sa balor nga 40,000 pesos.
Apang nakibot imaw kat masayuran nga gin-eukat kara it anang unga nga si Orlando Gumban ro eugta nga owa it permiso kana.
Sa makaron suno kay Susimo hay matsa ginboe-an eon imaw it poder sa anang kaugalingon nga eugta, kun sa siin, ginsakop pati ro bukon it prendado nga eugta nana.
Maskin sigon nagapukan it kahoy hay ginabawaean eon imaw partikular it anang umagad nga si Leovigilda Gumban.
Bangud kara, plano nana nga pasakaan it kaso ro anang umagad.
Boses ni Mr. Susimo Gumban
Samtang, depensa man ni Leovigilda Gumban nga kon owa sa andang promisa nga bayaran sa sueod it daywang domingo ro 40,000 pesos nga kantidad nga prenda sa eugta hay owa man sanda gintaw-an it kwarta ni kapitan Seraspi.
Sanda pa sigon ro nagbulig hay sanda pa ro nagaguwa nga maeain makaron.
Aminado man si Leovigilda nga dati eon sanda may owa pagka-ilintindihan it pamilya it anang asawa ag naka-abot eon sa demandahan.
