BALITA Espesyal– Sangka ayam halin sa Illinois (ilinoy), USA ro nakalista it bag-ong world record title bangud sa tumaeagsahon nga kahabaon it anang dila.
Nasayuran nga kan-o eamang hay ginsertipikahan it Guinness organization ro Labrador/German shepherd mix nga si Zoey bilang pinakabag-ong world record holder it nasambit nga titulo , apang naagaw eagi raya makaron it siyam nga dag-on nga si rocky nga ro anang dila hay naga abot sa 5.46-inches.
Suno sa mag-asawa nga nagapanag-iya kay Rocky nga sanday Brad ag Crystal Williams, nauna eon nanda nataeupangdan nga kakaiba ro dila it andang alaga ag ro andang obserbasyon hay pirme man nga ginahambae kanda it mga tawo sa andang palibot.
Natun-an it mag-asawa nga may una nga Guinness World Records category para sa longest tongue on a living dog kat makita nanda sa TV ro dating record-holder nga si Mochi.
Sa pag-usisa, natukiban ni Crystal nga namatay eon si Mochi rason nga nag apply imaw agud nga makaangkon it Guinness World Record ro anang alaga.
Nagpadaea ro Guinness it veterinarian nga si Dr. Bernard Bleem nga nagsukat sa dila ni Rocky nga nag abot ngani sa 5.46 inches.
Naagaw ni Rocky ro record halin kay Zoey nga may una eamang nga 5-inches nga dila, kun sa siin ro anang record hay nailista ko nagtaliwan nga buean.
Agud nga madetermina nga sueod sa Guinness, ro pamaagi it pagsukat kara hay dapat nga mag umpisa ro ruler sa punta it ilong hasta sa punta it dila.
