KALIBO, Aklan — Owa naging sabeag sa sangka bulag ukon visually impaired nga eaeaki ro anang kapansanan agud nga magpaabot it bulig sa haeos 12 beses eon nga pagdonate it dugo.
Suno kay Lowell Fegarido, 47-anyos, residente it Barangay Camaligan, Batan, Aklan nga umpisa ko 2012 hay nakasanayan eon nana nga magpasakop sa mga blood letting activity ag ko 2017 hay kada dag-on eon nga nagapasakop sa Dugong Bombo para mag-donate it dugo.
Si Fegarido hay natawo nga visually impaired person ukon indibidwal nga may kapansanan sa panan-awan ag may diperensiya man sa anang siki .
Kadungan kara, gin engganyo nana ro anang mga kaparehong mga visually impaired persons kamana man ro mga may mabaskog nga pang eawason nga magdonate man it dugo agud nga makabulig sa andang isigkatawo.
Sambilog man sigon imaw nga maukod nga tagpaeamati it Bombo Radyo Kalibo.
Umpisa nga mag-donate imaw it dugo hay nataeupangdan nana nga may manami raya nga epekto sa anang eawas.
Dugang pa nana nga obrahon nga “way of life” ukon maging parte eon it pagpangabuhi ro pag-donate it dugo bangud sa pagpati nga ro kada isaea katon hay may responsibilidad sa aton nga isigkatawo.
Samtang, ginkalipay it Philippine Red Cross (PRC)-Aklan Chapter ro pagiging blood galloner ni Fegarido.
