Kalibo Aklan——-Magapangatubang sa kasong pag-eabag sa Republic Act 1058 ukon Anti-drunk Driving Act ro sangka construction worker matapos madakpan it mga otoridad nga nagamaneho nga una sa impluwensya it makahieilong nga aeak sa kahabaon it Brgy. Laguinbanwa East, Namancia.
Maeuwas sa pagmaneho nga hilong hay gin-eabag pa it suspek nga si Blas Nacion Jr., 42-anyos, tumandok it Brgy. Bakyang, Madalag apang presenteng naga-istar sa Brgy. Bulwang sa nasambitang banwa ro COVID-19 curfew ordinance nga ginapatuman sa bilog nga probinsya it Aklan.
Base sa report, pilang mga residente sa lugar ro nagpaabot it reklamo sa taeatapan it Numancia PNP matapos ro makakueoeba nga pagmaneho ni Nacion.
Ginapabutyag nga naga-zigzag ro pagpadaeagan kara ag nagapang-agaw pa it linya sa ibang mga motorista.
Bangud kara hay insigidang nagresponde ro mga kapulisan sa lugar ag gindakop ro suspek para sa nagakaigo nga disposisyon.
