KALIBO,Aklan– Padayun nga gina-obserbahan sa provincial hospital ro sangka laborer matapos nga gin-einabu it anang kaibahan sa trabaho sa sangka furniture shop bandang alas-12:45 kahapon it aga-aga sa Brgy. Camanci Norte, Numancia.
Suno sa panaysayon it suspek nga si Russel Salinas, 40 anyos ro edad ag tumandok it Buenavista, Guimaraas nga naga-inuman sanda it anang katrabahong si Reden Casimero, 34 anyos, it San Jose, Romblon kat matabu ro insidente.
Gulpi eamang sigon nga nag abot ro biktima nga una eon sa impluwensiya it aeak ag na-istoryahan ro angot sa andang mga owa pagka-ilintindihan it mga katrabaho kun sa siin ro isyu hay naka abot eon sa andang amo.
Kat makaangkon it diskusyon, gina alegar nga gintueop imaw it biktima rason nga nagpangdueum ro anang panan-awan ag nagbaeos pinaagi sa pagbo-oe it espading.
Naeab-an ni Salinas si Casimero it daywang beses nga tinamaan sa anang ueo ag waea nga likod.
Matapos ro insidente hay insigidang nagpaeagiw ro suspek sakay it motorsiklo, apang na-intercept it mga kapulisan sa border checkpoint sa Cabangila, Altavas.
Ro daywa hay parehong stay-in worker sa furniture shop sa nasambit nga lugar.
Sa pihak nga parte, ginpahayag ni PMSgt. Felizardo Navarra it Numancia Municipal Police Station nga ginapahaum nanda ro kasong frustrated homicide nga igapasaka kontra sa suspek sa Lunes nga adlaw.
