KALIBO, Aklan—Naduea-an it kapin sa P10,000 pesos ro sangka 22-anyos nga eaeaki matapos nga mabiktima it scammer nga nagpakuno-kuno nga empleyado it Land Transportation Office ukon LTO Aklan.
Suno sa biktima nga gintago sa alyas nga “Dodong” nga sangka Michael delos Santos ro anang nakilaea sa social media nga nagpromisang magabulig sa pagproseso sa anang drivers license.
Nagtau sigon imaw it kumpiyansa sa nasambit nga eaeaki bangud nga nagpakilaea raya nga empleyado it LTO-Aklan.
Nagpadaea sigon imaw it kantidad nga gin-bale pa nana sa anang ginatrabahuhan nga construction company bilang driver pinaagi sa GCash.
Ulihi eon nana nasayuran nga bogus ro anang ka-transaksyon kat mag-agto mismo sa opisina it LTO ag natukiban nga owa sanda it empleyadong nagahingaean kay Michael delos Santos.
Apang sa mayad nga balita, ginbuligan ro biktima it hepe it LTO nga makabo-oe it drivers license ag nagbayad eamang it kapin sa 3,000 pesos matapos nga mataw-an it discount sa driving school ag medical certificate.
Sa pihak nga parte, ginpahayag it LTO-Aklan head Engr. Marlon Velez nga ro nasambit nga insidente hay ginpaabot eon nana sa andang regional office para sa maid-id nga imbestigasyon ag posibleng pagka-aresto sa suspek.
Nagpaandam man imaw sa tanan nga likawan ro mga fixer nga nagatanyag it serbisyo online kamana man nga makipag-transact eamang sa andang opisina agud nga malikawan ro online scammers.
