Nagakalhit sa mga social media ro mga litrato it sawa nga may daywang ueo.
Maabu ro nagduda nga edited eamang raya apang suno sa tag-ana it mga litrato nga si Nick Evans, nadakpan nana ro kakaibang sawa sa sangka garden sa Durban, South Africa.
Si Evans hay sangka professional snake rescuer ag ko nagtaliwan eamang nga domingo hay nakabaton imaw it tawag halin sa sangka residente it Ndwedwe ag nagpangayo raya it bulig angot sa nakita nana nga tumaeagsahon nga sawa sa anang garden.
Insigidang nagresponde si Evans ag insigida nana nga nadakpan ro two-headed Southern Brown Egg-eater snake.
Bukon it makamandag ro sawa ag makita sa haba kara nga juvenile ukon bata pa raya.
Ro mga sapat nga natawo nga may daywang ueo hay may kondisyon nga ginatawag nga polycephaly.
Ro nasambit nga kondisyon hay mas kaeabanan nga makita sa mga reptiles kumpara sa mammals.
Nagakatabu ro polycephaly sa mga sapat kon ro daywang embryo hay nagdukit apang owa eubusan nga nagsanib.
Sa makaron , una sa professional care eon ro sawa ag owa sanda it plano nga buhi-an ag ibalik raya sa kagueangan.
Raya hay bangud nga mahina ag indi masarangan it two-headed snake nga mabuhi nga naga-isaeahanon bangud nga mahinay nga maghueag.
