KALIBO, Aklan—Ginpasiguro ni Kalibo Sangguniang Bayan Member Ronald Marte nga hugut nga igapatuman ro ordinansa angot sa operasyon it mga resto bar kasunod it napabalitang pagpasueod it mga menor de edad ag naeakot pa sa mga gulo.
Suno kana nga makikipag-angot imaw sa Kalibo Municipal Police Station agud nga mas pang pabaskugon ro pagmonitor sa nasambit nga mga establisimento.
Nagpanawagan man si Marte sa mga tag-ana it resto bars nga makipag-cooperate ag hugut nga sundon ro ordinansa agud nga malikawan nga mapapundo ro operasyon it andang mga establisimento .
Sa pihak nga parte, sangka ordinansa man ro anang gindihon nga nagaproponer sa mga bar owners nga magtaeana it mga bouncer agud nga insigidang matapna ro mga komosyon.
Obligado man sigon ro mga raya nga mag-install it mga CCTV cameras sa andang mga establisimento para sa madasig nga imbestigasyon it kapulisan.
Samtang, sakit it ueo man suno kana it mga residente ro mga pamatan-on nga naga-inuman ag kon mahilong hay nagatuga it sangag ag gulo sa Pook Jetty Port.
Ginpasiguro sigon kana ni Kalibo OIC chief of Police Major Frenzy Andrade nga mag-deploy it pulis sa nasambit nga lugar .
