KALIBO, Aklan — Uman nga gin promisa ni Department of Environment and Natural Resources (DENR) sec. Roy Cimatu nga limpiyuhan ro isla it Boracay.
Gin pahayag it sekretaryo nga masyado eon nga maabo ro saeakyan sa isla bangud sa paggutok it daeagan it trapiko.
Sa anang pagbisita sa Aklan agud pangunahan ro official switch-on it Giant Christmas Tree makaron nga gabie, pagabuhinan sigon nanda ro pagsueod it mga saeakyan sa Boracay, apang, owa gin hinambitan sa kun anong klase it pamaagi.
Suno sa kana, magabisita imaw sa isla sa maabot nga Disyembre 22 kaibahan si Tourism secretary Wanda Teo agud estoryahan kun paano masolusyunan ro mga gina pangatubang nga problema sa isla.
Pila sa mga problema hay gina eakipan it pagbaha, pagkaduea it mga forest lands ag wetlands bangud sa overdevelopment kamana man ro paghigku it tubig eabi eon sa parte it Bulabog beach.
Gina reklamo man it mga residente ag turista ro traffic congestion sa pag abo it mga saeakyan sa maikit nga karsada.
Nauna kara, gin suhestiyon ni Cimatu ro paghalin sa LGU-Malay sa pagdumaea sa Boracay, apang, owa raya gin paburan it
provincial government sa pagpahayag nga mas mayad sa gihapon nga makaangkon it pagbueoligan kaibahan ro mga ahensiya it gobyerno sa pagsolusyon sa mga problema sa gina kabig nga naga pangunang tourist destinastion sa nasyun.
