KALIBO, Aklan—Ginpadumdum ni Fr. Tudd Belandres, kora paroko it St. John the Baptist Cathedral ro publiko nga taw-an it tiempo ag kahigayunan ro pag-obserbar it Semana Santa eabi eon sa mga Katoliko nga bukon eamang it puro pagbakasyon ro paga-isipon.
Suno kay Fr. Tudd nga nakaandan eon it kaabuan nga kada mag-abot ro Semana Santa hay mas excited pa ro tanan sa mga planong bakasyon bangud sa mga ginapatuman nga long weekend it gobyerno.
Gindugang pa kara nga dapat nga itigana ro Huwebes Santo, Biyernes Santo ag Sabado de Gloria para sa Simbahan.
Raya sigon ro tama nga tiempo nga mag ililiba ro bilog nga magpamilya, magpangamuyo ag maghinoesoe sa mga saea nga nahimo ag bukon it puro kasadyahan ro isipon sa nasambit nga mga inadlaw.
Ginsuhestiyon man nana nga magkompisar ro tanan ukon magtambong sa mga aktibidadis it simbahan.
Ginpahayag pa ni Fr. Tudd nga ro pagbakasyon hay maobra bisan anong oras ukon adlaw apang ro Semana Santa hay sang beses eamang sa sang dag-on agud nga magbalik sa sabak it Diyos.
Ginkalipay man it simbahan nga makaron nga dag-on hay haeos ginduea eon ro mga restrictions tuga it pandemya rason nga hilway eon ro publiko nga makapasakop sa anuman nga aktibidad nga gintaeana para sa Kuwaresma partikular ro pagpatigayon it via crucis ag visita iglesia.
