KALIBO, Aklan—Umpisa makaron nga adlaw it Huwebes, Mayo 25 hay temporaryo nga igasarado ro slaughter house it banwa it Numancia nga nahamtang sa Brgy. Badio.
Raya hay kasunod sa hinun-anon nga natabo nga ginpangunahan it lokal nga gobyerno it Numancia bilang mitigating measures sa nagapadayon nga pagpanaeasa it African Swine Fever ukon ASF virus sa andang banwa.
Suno kay Punong Barangay Victor Crispino it Brgy. Badio, Numancia nga umpisa man makaron nga adlaw hay uwa it mabakae nga karne it baboy sa andang merkado publiko.
Apang, ginapasugtan ro pagkatay sa mismong barangay ag ro naila nga magkonsumo it baboy pwede gihapon makabakae sa andang mga talipapa.
Mag-eowas kara, hugot ro implementasyon it border control checkpoint agud masiguro nga uwa gid it baboy ukon anumang produkto nga may baboy ro makasueod sa kada barangay.
Nagapati man ro opisyal nga nasudlan eon it virus ro andang barangay apang uwa pa sigon sanda naboe-an it sample.
