Gin-anunsyo eon ni British Prime Minister Keir Starmer ro anang pag-resign bilang lider it Labour Party nga magatau it daean sa pagpili it bag-ong lider nga magiging masunod nga prime minister it United Kingdom.
Sa anang pahayag sa Downing Street, ginpahayag ni Starmer nga bukon eon it imaw ro pinakamayad nga nagadumaea sa partido paagto sa masunod nga national election. Ginpahisayod eon sigon nana ro anang desisyon kay King Charles III.
Suno kay Starmer, maga-umpisa ro pagbaton it nominasyon para sa bag-ong lider sa Hulyo 9 ag magatapos bago ro summer recess it Parliyamento sa Hulyo 16. Ginaeauman nga makapili it bag-ong lider bago uman nga magbukas ro Parliyamento sa Setyembre.
Magapabilin anay si Starmer bilang punong ministro samtang ginapatigayon ro proseso it pagpili it anang kabaylo ag ginpasiguro nana ro maayos nga pagsaylo it liderato.
Nauna kara, nagpanumpa man bilang miyembro it House of Commons si Andy Burnham, nga ginasugid nga posibleng ideklara bilang bag-ong pinuno it Labour Party ag bag-ong prime minister sa pagahiwaton nga leadership election sa Hulyo.
Sa katapusan, ginpahayag ni Starmer nga magatutok imaw sa anang pamilya matapos ro anang pag-resign nga ginakonsidera nana nga “pinaka-importanteng trabaho” sa anang kabuhi.
