Ginpundo it Commission on Higher Education (CHEd) ro programa karang Study Now, Pay Later nga tuyong mabuligan ro mga college students pamaagi sa pagtao it loans nga puweding bayran kung sanda hay nakatapos eon sa andang kurso.
Raya hay bangud sa manabang payment rate nga gaabot eamang sa less than 10%.
Ginpaathag ni CHEd chairperson Prospero de Vera nga maabo pang mga loans sa nasambit nga programa ro owa pa nakabayad bangud kaabuan sa mga nag-avail it programa hay owa it trabaho matapos ro andang graduation rason nga owa sanda it bastante nga kwarta para mabayaran ro gintigayon nga loans.
Dugang pa ni De Vera nga naging Study Now, pay Never ro nasambit nga programa.
Sa idaeom man it Unified Students Financial Assistance System for Tertiary Education (Unifast), nagtaeana ro CHEd it P1 billion para sa mga enrolled students para mabuligan ro mga raya finacially.
Pagagamiton ro pondo para sa pagtao it loans sa mga estudyante nga kinhangean nanda nga pagabayaran antes nga sanda hay makatapos sa kolehiyo kung siin mas mayad eon sigon raya nga tikang kumpara sa Study Now, pay Later program.
Samtang, una eon nga ginkastigo ni Senator Risa Hontiveros ro komisyon nga nagdihon it sangka resolution nga tuyong imbestigahan ro P7 billion nga kwestyonableng pag guwa it pondo sa idaeom it Unifast.
