KALIBO, Aklan—-Ginpahayag ni Provincial Health Officer I Dr. Cornelio Cuatchon it PHO-Aklan nga inde maduea ro risgo nga makaangkon it Covid-19 eabi eon nga ginbutang ro bilog nga probinsya it Aklan sa modified general community quarantine ukon MGCQ.
Kaangot kara, ginpadumdom ni Dr. Cuatchon ro publiko nga sundon gihapon ro minimum health protocols partikular ro mandatory nga pagsuksok it face mask, social ag physical distancing kamana man ro pagpabilin sa tagsa ka panimaeay eabi eon kon uwa it importante nga paeanawon.
Umpisa hin-aga nga adlaw it Lunes, Hunyo uno hay pagaboe-on eon ro age restrictions.
Buot hambaeon, pwede eon kaguwa ro naga-edad it 21 panaba ag ro 60-anyos pataas provided nga may importante ro mga raya nga kinahang-eanon sa guwa ag magasunod eamang sa igapaguwa nga guidelines it gobyerno probinsyal agud nga makalikaw gihapon sa makamaeatay nga sakit.
Sa pihak nga parte, masobra sa 300 ka mga repatriated overseas filipino workers ro nakauli sa probinsya it Aklan.
Sa nasambit nga numero, kapin sa 100 eon sa mga raya ro nakauli sa tagsa nanda ka panimaeay matapos nga nagnegatibo ro andang confirmatory result it swab sample nga gin-eksamin sa Western Visayas Medical Center, sub-national laboratory it Department of Health ukon DOH.
