Nagapadayun ro imbestigasyon it mga awtoridad sa pagkamatay ni Delsol “Rey” Zunio Jr., sa sueod it comfort room it Aklan Rehabilitation Center (ARC), aga-aga it Martes, Hulyo 21 sa Barangay Nalook, Kalibo.
Si Zunio hay suspek sa pagbaril ag pagpatay sa 23 anyos nga empleyado it J&T Express Philippines sa Barangay Dumga, Makato, ko April 27, 2024.
Base sa resulta it autopsy, sangka tama it bala ro nakit-an sa eawas ni Bolido.
Base sa paunang impormasyon, nadaea pa imaw sa ospital apang gindeklara nga owa eon it kabuhi.
Suno kay Ret. PLTCOL. Ariel Nacar, Provincial Warden it ARC, nakatambong pa si Zunio, adlaw it Lunes, Hulyo 20 sa pagpamati it anang kasong Robbery with Homicide .
Dugang pa nga antes ro insidente hay gina-alegar nga ginpanao nana ro pila sa anang mga personal nga gamit. Padayun pa nga ginatumod ro rason it anang pagkamatay.
Nauna eon nga gin-aku ni Zunio ro pagpamaril, apang gin-insister nga pagpanakaw eamang kunta ro anang tuyo.
Mag-eowas sa kasong pagpatay, nagapangatubang pa imaw it kasong pageabag sa Republic Act No. 9165 o Comprehensive Dangerous Drugs Act of 2002.
Madumduman nga matapos ro pagpamaril hay nagpaeagyo ro suspek kaibahan ro sambilog pa sakay it sangka motorsiklo paagto sa banwa it Numancia.
Naaresto si Zunio matapos imaw nga eagson it mga pulis samtang ginamaneho ro sangka pueang Mitsubishi Mirage halin sa sangka checkpoint sa Barangay Venturanza, Banga, ko gabi-i it Abril 29.
Ro suspek, nga residente it Barangay Polo, Banga, hay naabutan it mga awtoridad sa Barangay Balagtasan, Madalag, daywang araw matapos ro insidente. Gin-aywan ni Zunio ro saeakyan sa pangpang it suba, apang nagbalik raya pagka-aga kun sa siin naaresto imaw it mga katapo it Madalag Municipal Police Station.
Matapos maipatuman ro search warrant, nakarekober ro mga pulis it 6 nga plastic sachet it ginadudahan nga shabu ag iba pang drug paraphernalia sa sueod it saeakyan.
Nagapangatubang pa si Zunio it mga kasong reckless driving ag disobedience of an agent of authority.
