Gin-aprubahan ag gin-adopt sa ginpatigayon nga regular session it Sangguniang Panlalawigan it Aklan ro tatlo ka mga resolusyon may kaangtanan sa pagpaabot it pagpasaeamat sa Bicolano congressmen sa pagbawi it mga raya sa andang hagna sa uman kunta nga pagbuhi sa Boracay Island Development Authority (BIDA) as a Government-Owned and Controlled-Corporation (GOCC); pasaeamat sa daywang Aklanon congressman partikular kanday second district representative Teodorico Haresco ag first district congressman Carlito Marquez sa pagnegosyar sa mga nasambit nga kongresista agud nga inde maipadayon ro hagna bangud sa pagpamaeabag it mga Aklanon ag ro resolusyon nga nagabawi sa pagdeklara bilang persona non grata sa ap-at nga Bicolano representatives.
Mag-eowas kara, nagpangayo man it pasaylo ro SP Aklan officials sa daywang matag-as nga lider it probinsya kon nasakit nanda ro boot it mga raya bangud sa kontrobersyal nga pagdeklara nga persona non grata sa mga kaibahan nanda sa lower house sa pihak nga ginbawi eon it mga raya ro ginabuhi kunta nga hagna.
