KALIBO, Aklan — Ginkustodiya it Kalibo Municipal Police Station ro tatlong kaeaeakin-an nga puro mga menor de edad nga ginaturo nga nagbuno sa magtiyo bandang alas-3:30 it aga-aga it Biyernes, Mayo 9, sa Roxas Avenue, Kalibo.
Base sa report, napatay it sambilog sa mga suspek nga nakilaea kay alyas Dodoy ro 25 anyos nga biktima nga nag angkon it lastro sa kilid it anang tiyan.
Stable man ro kondisyon it anang 16 anyos nga gumankon nga nabun-an man sa anang alima.
Suno kay Noel Villanueva Nama, gwardiya it sangka fast food chain ag nakasaksi sa krimen nga samtang nagakaon sa andang restaurant ro tatlong suspek hay gulpi eamang nga sumueod ro magtiyo nga mga biktima.
Kat makaangkon suno kana it komprontasyon ag nakita nana nga may kutsilyo ro sambilog sa mga suspek hay gintabog nana paguwa ro mga raya halin sa andang establisimento.
Kasunod kara hay nakita eon lang nana nga naga-inaway ro magtimbang nga grupo sa guwa hasta nga nabun-an ro magtiyo.
Ginsita pa sigon nana ro mga raya apang owa sanda nagapamati.
Insigida imaw nga nagtawag it pulis ag barangay tanod nga rumesponde man sa gin-eontaran it krimen .
Nadaea pa ro mga biktima it mga katapo it MDRRMO Kalibo, apang namatay ro sambilog samtang ginabueong sa Aklan Provincial Hospital.
Nagapati ro gwardiya nga may dating banggi-anay ro magtimbang nga grupo ag uman nga nagka-initan matapos nga magkita sa nasambit nga lugar.
