KALIBO, Aklan—Gintawag nga “inutil” it Bagong Alyansang Makabayan ukon Bayan-Aklan ro naging tikang it gobyerno kontra sa COVID-19.
Suno kay Kim Sin Tugna, OIC-Provincial Coordinator it Bayan Aklan nga bukon it klaro sa ginbuhian nga statement ni Pangueong Rodrigo Duterte sa anang kakatapos eamang nga State of the Nation Address (SONA) kon ano ro mga pagahimuon kara nga tikang agud matapna ro pagkalhit pa it virus sa nasyon.
Ginapahayag dugang nga nagahinueat eamang ro administrasyon nga taw-an it bakuna maghalin sa ibang pungsod.
Samtang, kuwestiyunable makarun para sa mga militanteng grupo ro ginhimo it Kalibo PNP sa sangka persona nga gina-alegar nga naging rason it kinagamo sa ginpatigayon nga hub-eag protesta.
Bandang ala-1:00 hasta alas 4:00 it hapon kat pabalik balik sigon raya sa lugar kon sa siin sanda nagpatigayon it protesta.
Nagapakuno kuno nga may katawag sa cellphone apang sa pagsikyar hay uwa man raya it kaistorya ag nagabo-oe eamang it video.
Napas-eawan nga magpakita it anang Identification card ro nasambit nga eaeaki.
Ginpatalikod eamang sigon sanda it madaling oras ag gilayon nga ginpahilway ro nagpakilaeang si Marco Lopez Cordero ag residente it Brgy. Pututan, Iloilo.
Gin-insister dugang nga dapat ginhold raya ag gin-imbestigahan agud masiguro nga bukon it carrier it virus nga nagadaea it sakit nga covid-19.
