KALIBO, AKLAN — Sa pihak it mga travel advisory it pilang embahada hanungod sa mga terror attack sa nasyun, nagtaas ro numero it mga naga bakasyong turista ku Abril sa isla it Boracay.
Suno kay Caticlan jetty port administrator Niven Maquirang nga pamatuod kara hay naga abot eon sa 183,047 ro tourist arrivals umpisa Abril 1 hasta 30, 2017 nga mas mataas kumpara ku nagtaliwan nga dag-un sa magkaparehong period.
Haeos 70 porsyento sigon kara ro lokal nga turista ag 30 porsyento ro mga estranghero.
Sa pihak kara, aminado si Maquirang nga nakaangkon it traffic sa Caticlan ag Cagban port bangud sa pagbuhos it mga bisita ag nakaangkon pa it kakueangan it mga naga biyaheng motorbanca bangud ro iba sa mga raya hay nasamad tuga it owa it untat nga biyahe.
Nagdunghan sigon sa pag aeabutan it mga turistang nakisadya sa LaBoracay umpisa ku Abril 25 ro mga delegado it Ship Southeast Asia and Japanese Youth Programme (SSEAYP) International General Assembly, ag mga nakipagbahin sa Palarong Pambansa 2017 sa Antique.
