BORACAY, Island — Nagapamayagpag ro tourist arrival sa isla it Boracay sa unang daywang buean it dag-on 2025.
Pamatuod kara ro nailista nga numero it mga nagbisita ko buean it Enero 1 hasta it 31 kon sa siin nakarekord ro Malay Tourism Office it kabilugan nga 199,992 tourist arrival.
Sa nasambit nga numero, 140,993 ro domestic tourist; 4,436 ro overseas Filipinos ag 54,563 ro foreign tourist.
Samtang, makaron nga buean it Pebrero 1 hasta it 16, nakalista ro nasambit hga taeatapan it kabilugan nga 98,123 tourist arrival nga ginakaeakipan it 69,415 ro domestic tourist; 26,495 ro mga dumueoong turista ag 2,213 mat-a ro mga overseas Filipino’s.
Bangud kara, makit-an gihapon ro pagkilaea it mga turista sa Boracay bilang nagapanguna nandang destinasyon bangud sa haeos kada dag-on hay ginabalik-balikan nanda ro kaanyag it isla.
Sa makaron suno kay Kathrine Licerio, tagapaghambae it Malay Tourism Office, padayon ro mga ginahimo nga tikang it andang taeatapan sa pagpanguna it lokal nga gobyerno it Malay agud nga mapabaskog ro promotion it Boracay sa bilog nga kalibutan.
Sa pihak kara, nag-umpisa eon man suno kay Licerio ro mga coordination meeting it taeatapan sa mga stakeholders para sa igapatigayon nga Love Boracay, sambilog sa pinakamabahoe nga ginaorganisang event sa kada summer season.
Ginpahayag dugang ni Licerio nga may mga series of activities nga ginapahauman in line sa nasambit nga selebrasyon.
